Силно невреме поплави патишта и предизвика штети во делови од Германија, соопштија денеска локалните власти, додека други делови од земјата се подготвуваат за претстојни поројни дождови.
Итните служби беа повикани на стотици локации, а најтешко погоден регион беше Франконија во Баварија. Неколку автомобили останаа заробени под вода во подвозници во Нирнберг и Фирт.
Најголема финансиска штета се случи во Унтермерцбах, северно од Нирнберг, каде гром веројатно запалил складиште со 60 до 70 возила, соопштија пожарникарите во првата проценка.
Во Тирингија, улиците беа поплавени и во градот Нордхаузен, а службите беа повикани да извлекуваат вода од подруми и патишта.
Повеќе од 100 милиметри дожд паднаа во тој регион за помалку од 12 часа, соопштија германските метеоролози.
Во градот Лудвигсхафен, во сојузната држава Рајнланд-Пфалц, се запали семејна куќа, веројатно по удар на гром. Никој не е повреден, но штетата изнесува до 100.000 евра, пренесува ДПА.
Изутринава, метеоролошките служби издадоа предупредувања за уште три окрузи на северот на Тирингија, со очекувано смирување на временските услови во попладневните часови.