Пакистан во текот на изминатата 2025 година беше најзагадената земја во светот со концентрации на опасни ситни честички познати како PM2.5 до 13 пати повисоки од препорачаното ниво на Светската здравствена организација (СЗО), покажа годишниот извештај објавен денеска.
Швајцарската компанија за следење на квалитетот на воздухот IQAir во својот годишен извештај изјави дека 13 земји и територии ги одржувале просечните нивоа на честички PM2.5 под стандардот на СЗО од пет микрограми на кубен метар минатата година, во споредба со седум во 2024 година.
Од 143 земји и територии што беа следени, 130 не ги исполнија упатствата на СЗО.
Бангладеш и Таџикистан се втори и трети на листата на најзагадени. Чад, статистички земјата со највисоко ниво на смог во 2024 година, се најде на четврто место во 2025 година, но падот на концентрациите на PM2.5 минатата година веројатно е резултат на недостаток на податоци.
САД минатиот март ја суспендираа глобалната програма за мониторинг што ги собираше податоците за загадувањето собрани од зградите на нивните амбасади и конзулати, наведувајќи ги буџетските ограничувања.
„Губењето на податоците во март направи да изгледа дека има значителен пад на нивоата на PM2.5 (во Чад), но ние навистина не знаеме“, рече Кристи Честер Шредер, главен автор на извештајот на IQAir.
Одлуката на САД го елиминираше примарниот извор на податоци за многу земји склони кон смог, а Бурунди, Туркменистан и Того не беа вклучени во извештајот за 2025 година поради недостаток на информации.
Индискиот град Лони беше најзагаден во светот во 2025 година, со просечно ниво на PM2.5 од 112,5 микрограми на кубен метар, по што следеше Хотан во северозападниот регион Синџијанг, во Кина, со 109,6 микрограми.
Во Индија, Пакистан и Кина се 25-те најзагадени градови во светот во изминатаа година.
Само 14 проценти од светските градови го исполнија стандардот на СЗО во 2025 година, што е намалување во споредба со 17 проценти претходната година, а канадските пожари предизвикаа зголемување на PM2.5 низ САД, па сè до Европа.
Меѓу земјите што ги исполнија критериумите на СЗО во 2025 година беа Австралија, Исланд, Естонија и Панама.