Иранскиот министер за надворешни работи, Абас Арагчи, повторно ја критикуваше Германија, еден ден откако канцеларот Фридрих Мерц му се закани на Техеран со нови санкции ако „не го запре насилството врз своето население и не ја прекине работата на својата воена нуклеарна програма“, објави ДПА.
„Германија некогаш беше мотор на напредокот во Европа, но сега стана мотор на регресија“, напиша Арагчи на „Х“, во која го обвини и Мерц дека има „непријатен карактер“.
„Иран отсекогаш ги поздравувал силните односи со Германија“, продолжи Арагчи. „Затоа е двојно жално што личност како г-дин Мерц сега ја претставува Германија на светската сцена“, додаде тој.
Вчера, пред да се впушти во своето прво патување во земјите од Заливот, Мерц рече: „Подготвени сме да го зголемиме притисокот врз Техеран“.
Германската влада тесно соработува со Велика Британија, Франција, САД, Израел и регионалните партнери, рече тој, нагласувајќи дека „мирот и безбедноста во регионот се исто така важно прашање за нас (за Германија)“.
Стравувањата од нов конфликт во Заливот се големи. Американскиот претседател Доналд Трамп постојано им се закануваше на раководството во Техеран со воени напади, делумно поради бруталните дејствија на безбедносните сили во задушувањето на демонстрациите за време на неодамнешните антивладини протести низ целата земја, во кои беа убиени стотици, ако не и илјадници, демонстранти, забележува ДПА.