Северна Кореја денеска повика на ограничување на нуклеарните амбиции на Јапонија. Апелот, упатен од претставник на севернокорејските власти задолжен за надворешна политика, беше објавен од државната новинска агенција КЦТА.
Неопходно е стремежот на Јапонија да се здобие со нуклеарно оружје да биде целосно ограничен. Земјата покажува „намера да поседува нуклеарно оружје“, изјавувајќи дека мора „да ги преиспита трите ненуклеарни“ принципи, рекол севернокорејски функционер.
Според КЦТА, Јапонија почнала активно да дава такви коментари веднаш штом Соединетите Американски Држави го одобриле барањето на Јужна Кореја да ѝ изградат подморница на нуклеарен погон.
Јапонија треба да поседува нуклеарно оружје, изјави во четвртокот претставник од канцеларијата на новиот премиер Санае Такаичи во неформален разговор со новинарите. Сепак, еден ден подоцна, јапонската влада официјално ги потврди долгогодишните принципи на земјата во областа на неширењето на нуклеарното оружје.
