Бројот на жртви во урнатиoт интернат на исламското средно училиште во Индонезија, што се случи пред седум дена, се зголеми на 54, објавија денеска спасувачите кои трагаат по исчезнатите под урнатините.
„Ги пронајдовме телата на 54 жртви“, соопшти Националната агенција за пребарување и спасување, додавајќи дека 13 лица сè уште се водат како исчезнати.
Модерна висококатница во градот Сидоарџо, во источната покраина Јава во Индонезија, одеднаш се урна пред седум дена додека учениците се собираа на попладневна молитва.
Уривањето на училиштето било толку силно што предизвика земјотрес во соседството.
„Ова е најсмртоносната катастрофа во Индонезија досега оваа година“, рече Буди Ираван, заменик-директор на Националната агенција за управување со катастрофи.
Операциите за пребарување и спасување во огромниот архипелаг обично траат една недела, но властите можат да ги продолжат доколку има индикации дека може да се пронајдат повеќе жртви, потсетуваат западните агенции.
Семејствата на исчезнатите деца во четвртокот ја прифатија иницијативата на локалните власти за употреба на тешка механизација по 72-часовниот „критичен период“ по кој шансите за преживување се многу мали. Истражителите, исто така, започнаа да ја истражуваат причината за уривањето на зградата, каде што се вршеа работи на реновирање. Експертите велат дека првичните индикации се дека статиката на зградата не ги исполнувала стандардите.
Лабавите градежни прописи и инспекциите предизвикаа загриженост за безбедноста на зградите во Индонезија.