Дански државјанин е уапсен во Данска под сомнение дека собирал информации за Евреите во Германија за иранската разузнавачка служба, веројатно за да подготви напади врз нив, објавија денеска германските обвинители.
– „Али С.“, кој беше уапсен во градот Архус, добил задача од иранската разузнавачка служба претходно оваа година да собира информации за „еврејски објекти и одредени еврејски поединци“ во Берлин, велат обвинителите.
Во јуни, тој шпионирал три објекти „можни за терористички напади врз еврејски цели“, се вели во соопштението.
Информациите што доведоа до неговото апсење дојдоа од германското разузнавање.
Ќе му се суди во Германија, но неговата екстрадиција од Данска сè уште не е договорена. Сè уште не е познато кога тоа ќе се случи.
Германија е близок сојузник на Израел и има долга историја на затегнати односи со Иран.