Вакцинацијата против сезонски грип која почна денеска во Гостивар се спроведува на три пункта и предвидено е да се дадат околу две илјади дози. Споредено со лани, бројката на вакцини за гостиварскиот регион е зголемена за речиси 500 дози.
Според д-р Зорица Зафировска, епидемиолог во Центар за јавно здравје Тетово епидемиолошко одделение Гостивар, интересот споредено со претходните години е зголемен.
– Интересот од година во година расте, што укажува на фактот дека граѓаните водат сметка за превенцијата од грип. На првиот ден од вакцинирањето, предвидено е да бидат дадени 150 дози, вели д-р Зафировска.
Таа посочува дека покрај комерцијалната која чини 700 денари, има и бесплатна која е наменета за повеќе категории граѓани, како хронично болните, лицата со над 65 годишна возраст, бремените жени здравствените работници и децата до петгодишна возраст. Комерцијалните вакцини може да ги примат и лицата кои се заинтересирани за да се заштитат од сезонскиот грип.
Закажувањето за вакцинирање оди преку „Мој термин“, односно пациентите се запишуваат и оставаат податоци, по што добиваат повратна порака во која им се наведени денот и часот кога да се јават на еден од пунктовите.
За трите гостиварски општини Гостивар, Врапчиште и Маврово-Ростуше предвидени се околу две илјади дози. Минатата година во гостиварско беа предвидени и аплицирани околу 1.500 дози.