Портпаролката на Белата куќа, Каролин Ливит, денеска објави дека уште 20 земји „поднеле барање да се приклучат кон Одборот за мир на американскиот претседател Доналд Трамп“.
Ливит не ги именуваше земјите што аплицирале, објавија американските медиуми.
Иако Одборот за мир доби мандат од Советот за безбедност на Обединетите нации само за да го надгледува управувањето со Газа во следните две години, администрацијата на Трамп има за цел да го користи ова тело за решавање на други конфликти низ целиот свет.
Зборувајќи за време на прес-конференцијата во Белата куќа, Ливит, исто така, рече дека враќањето на последниот преостанат израелски заложник од Газа е „огромен подвиг на надворешната политика“ за Трамп, Израел и целиот свет.
Израелската војска ги врати остатоците од последниот преостанат израелски заложник што го држеше Хамас во Појасот Газа, исполнувајќи го клучниот услов за почеток на втората фаза од планот на американскиот претседател за завршување на војната во Појасот Газа.
Посмртните останки на заложникот Ран Гвили се идентификувани и вратени за погреб, соопшти израелската војска.