Турција денеска го поздрави формирањето на новата преодна влада во Сирија.
„Овој чекор, кој доаѓа по свикувањето на Конференцијата за национален дијалог и објавувањето на Уставната декларација, ја покажува посветеноста на сириската администрација за напредок во политичката транзиција, водена и управувана од Сиријците, на инклузивен начин“, се вели во соопштението на турското Министерство за надворешни работи.
Министерството соопшти дека Турција ќе продолжи да го поддржува сеопфатниот и инклузивен политички процес за воспоставување безбедност и стабилност во Сирија.
Министерството, исто така, ја повика меѓународната заедница да се фокусира на стабилизирање на Сирија, нагласувајќи ја потребата од безусловно укинување на санкциите и започнување на напорите за обнова.
Сирискиот претседател Ахмед ал Шара ја објави новата преодна влада на земјата, што се смета за клучен момент во транзицијата од децениското владеење на семејството Асад и важен за подобрување на врските на Дамаск со Западот, јавија агенциите.
Башар ал Асад, кој владееше со Сирија околу 25 години, побегна во Русија откако бунтовничките сили го зазедоа Дамаск на 8 декември и ставија крај на режимот на партијата Баас – на власт во Сирија од 1963 година.
Ал Шара, кој ги предводеше силите кои го соборија Асад, беше прогласен за привремен претседател на крајот на јануари.