Британија мора да биде подготвена војната со Иран да продолжи „уште некое време“, изјави денеска премиерот Кир Стармер.
Стармер им порача на пратениците дека е „тешко да се одговори“ колку долго ќе трае кризата и дека го предупредил својот тим да не паѓа во „лажна утеха“ мислејќи дека ќе има „брз и предвремен крај на ова“.
Британскиот премиер, исто така, инсистираше на тоа дека конфликтот „не е наша војна и дека не дозволуваме да бидеме вовлечени во оваа војна“, додека одговараше на прашања од пратеници.
Во обраќање пред Комитетот за врски (Liaison Committee), составен од претседавачи на избрани комисии во Долниот дом, Стармер рече дека ги поздравува извештаите за разговорите меѓу Соединетите Американски Држави и Иран.
Но, на прашањето колку долго очекува да продолжи конфликтот, тој рече: „Тешко е да се одговори на тоа прашање, ако бидам искрен за тоа“.
– Мислам дека целиот наш фокус и енергија мора да бидат во насока на брза деескалација, но мораме да планираме врз основа на тоа дека ова би можело да потрае извесно време, и тоа е начинот на кој ќе планираме попладнево – рече Стармер.
Неговото појавување пред Комитетот за врски дојде само неколку часа откако американскиот претседател Доналд Трамп изјави дека ќе ги „одложи“ нападите врз иранската енергетска инфраструктура по „многу добрите и продуктивни“ разговори со Техеран.
Стармер им изјави на пратениците дека Обединетото Кралство било „запознаено“ со разговорите.
Трамп претходно се закани дека „ќе ги збрише иранските електрани доколку Техеран не ја отвори Ормуската Теснина за пловидба до понеделник навечер“.
Но, зборувајќи со новинарите во Флорида, американскиот претседател рече дека неговите советници имале разговори со „висока личност“ во иранскиот режим и дека повеќе разговори треба да се одржат „наскоро“.
Говорејќи пред Комитетот за врски, британскиот премиер инсистираше на тоа дека Обединетото Кралство нема да се вклучи подлабоко во конфликтот.
Обединетото Кралство и неговите сојузници ќе продолжат да дејствуваат во сопствената „колективна самоодбрана“, рече Стармер, додавајќи: „Но, ова не е наша војна и ние не сме вовлечени во оваа војна“.
Тој, исто така, рече пред комитетот дека Британија има „многу ефикасни начини да се одбрани“ во контекст на прашањата дали иранските ракети со долг дострел насочени кон Обединетото Кралство би можеле да бидат пресретнати.
– Не сакам да го зголемувам нивото на јавна вознемиреност. Луѓето се загрижени за она што веќе го гледаат на своите телевизиски екрани. Тие се загрижени за влијанието што тоа ќе го има врз нив, особено економски, во нивните домаќинства – додаде тој.
На друго место, премиерот откри дека долго одложуваниот план за одбранбени инвестиции сега е на неговото биро и чека финално разгледување, и сугерираше дека се залага за поблиска соработка со Европската Унија за одбраната во иднина.
Приклучувањето кон SAFE (Безбедносна акција за Европа), одбранбен фонд на Брисел, „сигурно ќе биде на дневен ред“ на претстојниот самит меѓу Обединетото Кралство и ЕУ, а веќе се воделе „интензивни дискусии“ за тоа како да се продолжи понатаму, рече Стармер.
Британскиот премиер денеска ќе претседава со состанокот на владиниот комитет за итни случаи „Кобра“ за да разговара за тоа како да се справи со економското влијание на конфликтот.