Советот за безбедност на ОН треба да гласа денеска за резолуција што би го заштитила комерцијалниот бродски превоз во Ормуската Теснина, но во значително ублажена форма откако Кина, која имаше право на вето, се спротивстави на овластувањето за употреба на сила, соопштија дипломати.
Цените на нафтата скокнаа откако САД и Израел го нападнаа Иран кон крајот на февруари, предизвикувајќи конфликт што траеше повеќе од пет недели во кој Техеран во голема мера ја затвори теснината, клучна енергетска артерија.
Напорите на Бахреин, кој моментално го држи 15-члениот совет, за обезбедување усвојување на резолуцијата вклучуваа повеќе нацрти што се обидоа да го надминат противењето од Кина, Русија и други. Најновата верзија изоставува какво било експлицитно овластување за употреба на сила.
Наместо тоа, текстот „силно ги охрабрува државите заинтересирани за користење на комерцијални поморски патишта во Ормуската Теснина да ги координираат напорите, од дефанзивна природа и соодветни на околностите, за да придонесат за обезбедување на безбедноста и сигурноста на пловидбата низ теснината“.
Во него се вели дека таквите придонеси би можеле да вклучуваат „придружба на трговски и комерцијални бродови“, а текстот, исто така, ги поддржува напорите „за одвраќање на обидите за затворање, нарушување или мешање во меѓународната пловидба низ Ормуската Теснина“.
Дипломатите рекоа дека ублажената верзија има поголеми шанси да биде усвоена, но останува нејасно дали ќе успее. Усвојувањето бара најмалку девет гласа „за“ и без вето од пет постојани членки – Велика Британија, Кина, Франција, Русија и САД.
Бахреин, кој има поддршка од другите арапски земји од Заливот и Вашингтон во своите напори, минатиот четврток објави нацрт-документ со кој би се одобриле „сите потребни одбранбени средства“ за заштита на комерцијалниот превоз, но гласањето за него беше одложено до петок и сабота.
Бахреин претходно го отстрани експлицитното упатување на обврзувачко спроведување.
Минатиот четврток, Кина се спротивстави на резолуцијата со која би се одобрила употребата на сила, велејќи дека тоа би значело „легитимирање на нелегалната и неселективна употреба на сила, што неизбежно би довело до понатамошна ескалација и сериозни последици“.
Иран вчера изјави дека сака траен крај на војната и се спротивстави на притисокот за повторно отворање на теснината, додека американскиот претседател Доналд Трамп предупреди дека земјата може да биде „уништена“ ако не го исполни рокот што го постави до вечерва за договор.
Кинескиот министер за надворешни работи Ванг Ји изјави во неделата, по разговорите со својот руски колега, дека Кина е подготвена да продолжи со соработката со Русија во Советот за безбедност и да вложи напори за смирување на ситуацијата на Блискиот Исток.
Ванг рече дека фундаменталниот начин за решавање на проблемот со теснината е што е можно поскоро да се постигне прекин на огнот. Кина е најголемиот купувач на нафта во светот што минува низ Ормуската Теснина. (МИА)