Во израелските напади во изминатите 24 часа загинаа 700 луѓе, соопшти попладнево портпаролот на Владата на Хамас во Појасот Газа.
Нема независна потврда за тоа соопштение за медиумите, а портпаролот додаде дека многу жртви се затрупани во урнатините и дека на спасувачите им било тешко да стигнат до ранетите и да ги однесат во болница.
И портпаролот на израелската армија денеска ги повика жителите на арапски да напуштат одредени области на југот на Појасот Газа, додека цели и на север и на југ се бомбардираат по завршувањето на примирјето во петокот.
Израелската војска нареди дополнителни локации во и околу вториот по големина град во Појасот Газа, Кан Јунис, да бидат евакуирани бидејќи офанзивата се шири кон јужниот дел на територијата, каде што се вели дека се кријат многу лидери на Хамас.
Синоќа и утринава беа бомбардирани областа Кан Јунис и градот Рафах, исто така на југ, и делови од северот, кои беа во фокусот на израелските воздушни напади, а потоа и копнените операции од 7 октомври.
Многу од околу 2,3 милиони жители на Газа побегнаа на југ откако израелските сили им наредија на цивилите да излезат од северот на почетокот на војната која сега трае речиси два месеци.
Поради обновувањето на конфликтот, пропаднаа надежите за постигнување договор за уште едно привремено примирје.
Еднонеделниот прекин на огнот што заврши во петокот овозможи ослободување на десетици заложници, Израелци и странци, кои ги држат палестинските екстремисти во Газа.
Израелскиот премиер Бенјамин Нетанјаху синоќа најави дека војната ќе продолжи се додека неговата земја не ги постигне сите свои цели, велејќи дека тоа е невозможно без копнена операција.
Денес, израелската војска ги прошири наредбите за евакуација во областа Кан Јунис и побара од жителите да напуштат уште најмалку пет локации и населби за своја безбедност.
Жителите рекоа дека израелската армија фрлила летоци со кои им наредува да се преселат на југ кон Рафах, или крајбрежната област на југозапад. Во летоците пишувало дека „градот Кан Јунис е опасна борбена зона“.
Утринава три тела на загинатите и десетици ранети во израелски напад врз станбена зграда во источниот дел на градот се префрлени во главната болница во Кан Јунис, соопшти новинар на АП.
Уште 31 тело на загинати во израелското бомбардирање на центарот на Газа се префрлени во болницата за маченици Ал Акса во градот Деир ел Балах, изјави вработен.
Видеото на АП покажува тела во бели вреќи на земја пред болницата додека десетици луѓе утрово се молеа за мртвите. Телата потоа биле однесени со камион на погреб.
Набљудувачите на ОН во извештајот пред најновите наредби за евакуација рекоа дека оние на кои им беше кажано да ја напуштат сочинуваа четвртина од територијата на Газа, дом на 800.000 луѓе пред војната.
САД, најблискиот сојузник на Израел, ја предупреди земјата да избегне масовно раселување на жителите.
Агенцијата на ОН за палестински бегалци соопшти дека речиси 958.000 луѓе се раселени во 99 згради на ОН во јужниот дел на Газа, вклучително и 34 во Кан Јунис.
Израелската војска соопшти дека нејзините воени авиони и хеликоптери синоќа „погодиле терористички цели во Појасот Газа, вклучително и влезови во тунели, командни центри и складишта за оружје“ и дека беспилотното летало убило пет борци на Хамас.
Во северниот дел на Газа, спасувачките тимови со мала опрема ископаа низ урнатините на зградите во бегалскиот камп Џабалија и другите населби на главниот град Газа во потрага по можни преживеани и тела на загинатите.
Очевидците рекоа дека воздушните напади и гранатирањето не престануваат, дека „ситуацијата е незамислива, дека смртта е насекаде“, и дека секој може да умре за миг.
Министерството за здравство на Газа во саботата соопшти дека вкупниот број на загинати од почетокот на војната надминал 15.200, главно жени и деца, и дека повеќе од 40.000 луѓе биле ранети. Во израелската офанзива на северот на Газа загинаа 78 војници.
На првиот ден од војната, во нападите на палестинските екстремисти од Газа, на југот на Израел беа убиени над 1.200 луѓе, главно цивили, а беа земени 240 заложници.