Израел нареди евакуација на станбена зона во Деир ал Балах, во центарот на Газа, на неколку стотини метри од болницата маченици Ал-Акса, една од последните кои сè уште работат на палестинска територија.
Армијата најави дека „наскоро ќе дејствува против екстремистите“ во областа.
Евакуацијата не ја вклучува болницата, но за време на минатите евакуации, луѓето ја напуштија околината во страв дека борбите би можеле да се прошират.
Поради израелската офанзива во Газа, започната како одмазда за нападот на Хамас врз јужен Израел на 7 октомври, огромно мнозинство од 2,3 милиони жители на Појасот беа раселени, честопати повеќекратно.
Според податоците на ОН, досега во различни прилики околу 84 отсто од територијата на Газа беше под наредба за воена евакуација.
Крајбрежниот појас, долг само 40 километри и широк 11 километри, од мај е под целосна опсада на израелските сили.
Војната уништи голем дел од здравствениот систем на Газа, а болниците се борат да функционираат бидејќи расте бројот на ранети од израелските напади. Тие станаа и засолништа за илјадници луѓе во шатори во дворовите и паркинзите.
Израелските сили во неколку наврати вршеа рации во болниците од почетокот на војната, обвинувајќи ги Хамас и другите екстремистички организации дека ги користат за воени цели, што здравствените власти во Газа го негираа.
Израелската армија објави дека во текот на ноќта бомбардирала магацини со оружје на Хезболах во долината Бека, Либан.
Израелскиот министер за одбрана Јоав Галант изјави дека „нападите на магацините за муниција во Либан се подготовка за она што може да се случи“.
Хезболах објави дека одговорил со напад на израелските воени постројки на Голанската висорамнина со ракети Катјуша, пренесува Ројтерс.