Генералниот секретар на Обединети нации, Антонио Гутереш денеска предупреди дека некои острови во Тихи Океан се изложени на ризик да бидат уништени од циклони, топлотни бранови и зголемување на нивото на морето предизвикани од климатските промени.
– Високото и зголеменото ниво на морето претставуваат огромна закана за Самоа, Пацификот и другите мали островски држави во развој, а овие феномени бараат решителна меѓународна акција, истакна Гутереш за време на посетата на главниот град на Самоа, Апија.
Тој додаде дека иако земјите од Пацификот придонесуваат со само 0,02 отсто од глобалните емисии на јаглерод, тие се на првата линија на климатската криза, соочени со екстремни временски настани – од тропски циклони до рекордна топлина на океаните.
– Судбината на овие острови зависи од ограничувањето на глобалното затоплување на 1,5 степени Целзиусови над прединдустриските нивоа, цел која речиси 200 земји се согласија да работат на КОП21 во 2015 година, наведе Гутереш.
Тој ги повика богатите земји да ги почитуваат своите обврски за финансирање на последиците од ефектите од климатските промени во земјите во развој и апелира на меѓународна акција за борба против прекумерниот риболов и загадувањето со пластика, особено во Тихи Океан.