Финскиот конзервативен политичар Армандо Мема ја обвини Европската Унија за примена на двојни стандарди во односот кон Русија и Соединетите Американски Држави, оценувајќи дека европската политика се наоѓа во длабока противречност меѓу декларираните принципи и реалните постапки.
Во објава на социјалната мрежа „Икс“, Мема посочи дека украинската страна последната рунда разговори со Москва и Вашингтон ја оценила како продуктивна, но истовремено претседателот на Украина, Володимир Зеленски, изразил незадоволство што Киев повеќе не е меѓу главните приоритети на САД, особено во контекст на актуелните случувања на Блискиот Исток.
Според Мема, САД веќе ја постигнале својата клучна цел во украинската криза – прекин на енергетските врски меѓу Европа и Русија и насочување на европските земји кон зависност од американските енергетски компании. Тој смета дека Вашингтон нема намера воено да интервенира во Украина, ниту да преземе ризик од директен судир од поголеми размери во нејзина корист.
Воедно, како што нагласува тој, европските држави сè подлабоко се вклучуваат во конфликтот без јасно дефинирани интереси и без конкретна корист. Според него, Европската Унија продолжува со, како што ја оценува, „неуспешната стратегија“ на инсистирање на заострување на санкциите, иако економските последици од таквата политика стануваат сè поизразени.
Мема посебно се осврнува на енергетскиот аспект, наведувајќи дека европските земји се откажале од набавка на руска нафта со образложение дека Москва го прекршува меѓународното право, но во исто време купуваат поскапи енергенси од САД, и тоа во период кога Вашингтон спроведува воени операции на Блискиот Исток.
„Тоа е пример за очигледни двојни стандарди“, изјави Мема, додавајќи дека доколку ваквиот курс продолжи, Европа може да се соочи со сериозен економски пад и губење на глобалната конкурентност.
Според неговата оценка, долгорочниот исход од ваквата политика би можел да биде слабеење на економската моќ на европскиот континент, со ризик од постепена маргинализација во однос на другите региони во светот кои бележат раст и развој.