Во една од многуте новообјавени е-пораки, осудениот педофил Џефри Епштајн – кој беше пронајден обесен во својата ќелија во 2019 година додека чекаше судење за трговија со луѓе – наведува дека Бил Гејтс, еден од најбогатите луѓе во светот, основачот и поранешен директор на Мајкрософт и коосновач на Фондацијата Бил и Мелинда Гејтс, се заразил со сексуално пренослива болест откако спиел со млади Русинки, објавува британскиот „Телеграф“.
На 18 јули 2013 година, Епштајн си испратил порака што содржела исклучително непријатни обвинувања против основачот на Мајкрософт.
-Ме барате да ги избришам е-пораките во врска со вашата сексуално пренослива болест, вашето барање да ви обезбедам антибиотици што тајно можете да ѝ ги дадете на Мелинда и опис на вашиот пенис, се вели во е-поштата.
Во 1:03 часот истото утро, Епштајн си испратил уште еден е-мејл, објавувајќи ја својата оставка од Фондацијата Бил и Мелинда Гејтс. Бидејќи Епштајн никогаш не работел за фондацијата, се верува дека ги пренел зборовите на некој друг во е-поштата.
„Вплеткан сум во сериозен брачен спор меѓу Мелинда и Бил… Како негова десна рака, бев замолен, и погрешно се согласив, да учествувам во прашања кои се движеа од морално несоодветни до етички проблематични, и постојано бев молен да правам работи блиски до, а потенцијално и над, законот…
Од помагање на Бил да добие лекови за борба против ефектите од сексот со руски девојки, до посредување во неговите нелегални интимни врски со мажени жени, до барање од мене да му обезбедам Адерал (лек за стимуланс на централниот нервен систем кој првенствено се користи за лекување на ADHD и нарколепсија со зголемување на нивоата на допамин и норадреналин во мозокот, оп. автор.) за турнири во бриџ, бидејќи сум доктор, но не сум овластен да пишувам рецепти“, напиша Епштајн.
Обвинувањата поврзани со Гејтс не се официјално потврдени и произлегуваат од новообјавените милиони документи што ги објави Министерството за правда на САД во петокот. Документите, исто така, вклучуваат фотографии – без датум – на кои се гледа Бил Гејтс со жена чие лице е замаглено.
Портпаролот на коосновачот на Мајкрософт, Бил Гејтс, ги отфрли како „апсолутно апсурдни и целосно лажни“ обвинувањата што се појавуваат во најновата серија документи за Епштајн, вклучувајќи ги и тврдењата дека Гејтс наводно се заразил со сексуално пренослива болест.
Ова се две е-пораки датирани на 18 јули 2013 година, за кои се чини дека се составени од Епштајн. И двете биле испратени од неговата е-пошта и вратени на истата сметка, без докази дека некогаш стигнале до Гејтс. Документите не покажуваат никакви е-пошта сметки поврзани со Бил Гејтс, а пораките не се потпишани.
Од содржината се чини дека Епштајн можеби ги напишал е-пораките во име на трето лице, но нема потврди за ова.
Портпаролот на Бил Гејтс за Би-Би-Си изјави дека тврдењата доаѓаат од „докажан, горчлив лажго“ и нагласи дека документите всушност ја покажуваат фрустрацијата на Епштајн што не може да изгради потрајна врска со Гејтс и до каде бил спремен да оди за да го компромитира.