Американскиот претседател Џо Бајден денеска во Париз ќе се сретне со украинскиот претседател Володимир Зеленски, при што ќе најави нов пакет воена помош од 225 милиони долари за Украина.
Средбата ќе се одржи во рамките на одбележувањето на 80-годишнината од истоварувањето на сојузниците во Нормандија.
Ова ќе биде нивна директна средба откако Зеленски го посети Вашингтон минатиот декември, кога двајцата се обидоа да го надминат противењето на републиканците во американскиот Конгрес за поголема помош за Украина.
Тие повторно ќе се сретнат следната недела на самитот на Г7 во Италија, на кој најбогатите земји ќе разговараат за користење на руските средства замрзнати по руската инвазија за да обезбедат 50 милијарди долари помош за Украина.
Зеленски минатиот месец изјави дека на западните земји им треба премногу долго време за да донесат одлуки за помош.