Четворица мажи се уапсени во Обединетото Кралство во рамки на антитерористичка истрага под сомнение за шпионажа во корист на Иран, соопшти денеска лондонската Метрополитен полиција. Приведените се сомничат за помагање на странска разузнавачка служба и следење на чувствителни локации.
Според полициските извештаи, истрагата е насочена кон сомневања за надзор на локации и поединци поврзани со еврејската заедница на подрачјето на Лондон. Апсењата се извршени во текот на ноќта на адреси во северниот дел на британската престолнина.
Командантката на антитерористичката единица во Лондон, Хелен Фланаган, истакна дека станува збор за дел од долготрајна истрага.
-Разбираме дека јавноста, а особено еврејската заедница, би можела да биде загрижена. Како и секогаш, ги повикувам граѓаните да останат претпазливи и да нè контактираат доколку забележат нешто сомнително, изјави Фланаган.
Од четворицата главни осомничени, еден е ирански државјанин, додека тројца имаат двојно британско-иранско државјанство. Во рамки на истата акција, приведени се уште шест други лица под сомнение за помагање на сторителите.
Оваа операција доаѓа во период на зголемени тензии и засилени мерки за безбедност во британската престолнина. (МИА)