Граѓаните да ги заштитат своите водомери и директно да не бидат изложени на ниски температури, упати апел денеска директорот на Штипското комунално претпријатие „Исар“, Александар Арсов.
-Ние апелираме, иако нашите граѓани се совесни и ги знаат мерките кои треба да ги преземат, а тоа значи соодветно да ги заштитат своите водомери кои директно се изложени на ниските температури, вели Арсовски.
Освен домашните водомери, Арсовски вели дека нема опасност од замрзнување на водоводната мрежа низ градот Штип и покрај дефектите кои се случуваат деновиве, сите цевки соодветно се заштитени и не се оставени директно изложени на ниски температури за да замрзнат.
-Конкретно за подземната водоводна инсталација не постои опасност од мрзнење. Ние на места каде што деновиве имаме дефекти на водоводната мрежа, навремено ги санираме и ги заштитуваме цевките да не бидат изложени на ниските температури, рече Арсовски.
Тој истакна дека и покрај ниските температури и лошите временски услови, екипи на ЈП „Исар“ се на терен со што се извршуваат сите неопходни задачи, од собирање на ѓубре и смет, се до поправка на дефекти на водоводната линија.