Конечно се откочува процесот за полагање на лиценци за негувателки и воспитувачки во градинките, со кој се решава проблемот на над 2.000 лица. Неправдата ќе биде исправена, нема да има полагања преку ред и повторно ќе важи правилото- прв дојден, прв услужен… Изградбата на новите планирани градинки низ Македонија, пак, ќе ја намали листата на чекање за упис на децата.
За ова разговаравме со заменик- министерот за социјална политика, демографија и млади, Ѓоко Велковски, кој за КУРИР, потврди дека на владина седница помина Законот за заштита на децата, а очекува дека и пратениците ќе дадат поддршка на собраниската седница.
-Уште од октомври 2023 година процесот на лиценцирање во министерството за жал запрел. Потоа во техничката влада направивме напори за промена на Законот, но не успеавме, не наидовме на слух кај тогашниот парламентарен состав. Со ова запирање на процесот повеќе од 2.500 лица чекаат на листите за лиценцирање. Во овие години, 2021, 2022 и 2023 година тие што аплицирале за жал, се уште чекаат, а имаше примери такви кои од 2023 година пред самиот истек на тогашната постапка за лиценцирање, само со еден месец пријавени веќе беа положени, односно завршено беше нивното лиценцирање. Тоа дава тенденција дека не се почитувало правилото тој што прв бил дојден, прв да биде услужен.
Одговорноста за ова, Велковски ја гледа единствено кај поранешното раководство на министерството.
Над 5.000 дечиња во Македонија се на листите на чекање за упис во детските градинки
-Предизвикот за нови капацитети навистина е голем и како Влада и во програмата која што тогаш беше партиска, сега веќе е и владина, предвидуваме да се изградат над 20-тина градинки кои што ќе значат растеретување, односно згрижување на сите кои се на листата на чекање. Веќе го работиме активно тој процес, она се што беше застанато како детски градинки во изградбата од претходната власт, веќе се во завршна фаза и очекувам до крајот на годината да профункционираат…
Со новиот гранд кој што го одобри Владата, односно се распиша повик, оној унгарски кредит кој беше земен токму наменет за локалните самоуправи- тука веќе имаме на повикот пријавени 4 општини на кои им се прифатени апликациите, склучени се договорите и дел од постапките за јавни набавки од самите општини се распишани. Така да очекуваме за многу брзо време да бидат ставени во функција, а секако очекуваме и новиот повик кој ќе биде во февруари општините да направат проекти и да аплицираат и они.
Повик до локалните самоуправи
-Локалните самоуправи да го употребат она што го даваме како можност, како министерство, а тоа е изградба на детски градинки во други просторни услови, односно онаму каде што имаат помала потреба на дечиња, тоа може да го направат во објекти кои се во сопственост на самата локална самоуправа, а да бидат адаптирани- опремени од страна на нашето министерство. Ова е директна помош на локалната самоуправа, да не градиме големи капацитети каде што можеби и нема потреба. Има навистина многу модели каде што може да го намалиме бројот на листи на чекање, потенцира Велковски за КУРИР.