Управата за јавни приходи (УЈП) од почетокот на годинава до 30 октомври извршила 3712 надворешни контроли кај субјекти од различни дејности по основ на Законот за регистрирање готовински плаќања и кај 1948 од нив се констатирани неправилности. Само во октомври извршени се 679 контроли и во 416 се евидентирани неправилности.
Како што соопшти директорката на УЈП, Сања Лукаревска, денеска на брифинг со новинарите, на 11 септември на подрачјето на Бутел, Старата чаршија и Чаир откриени се 44 неправилности во 63 контроли. Утврдено е и дека осум физички лица вршеле нерегистрирана дејност за што УЈП пријавила во Државниот пазарен инспекторат.
Таа соопшти и за постапување на 16 октомври во Арачиново, во соработка со МВР и Пазарниот инспекторат, каде што неправилност била констатирана кај осум од 16 објекти кои биле отворени во моментот на контролата, а биле откриени и осум со нерегистрирана дејност.
По реакции во јавноста, УЈП направила контрола и на паркингот кај поликлиниката Бит-пазар и утврдила две неправилности и две нерегистрирани лица кои наплаќаат паркирање.
-Во два наврата имаме постапено за овие случаи, и во двата обида имаме констатирано неправилност, што значи дека треба да има кривично дело. Меѓутоа, ќе видиме како да постапиме во координирана акција и со Пазарната и со Управата за финансиска полиција, рече Лукаревска.
Направени се контроли и на 11 клиники, од кои неправилности имало утврдено кај четири во однос на фискализација – на Онкологија и на клиниките за детски болести и за очни болести, како и кај еден универзитетски институт. Кај Институтот за јавно здравје, пак, нема неправилности во однос на фискализација, но контролата е насочена по основ на данокот на добивка.
-Евидентна е состојбата со неиздавање фискални сметки на клиниките. Иако се смета дека надлежен да постапува е Државниот санитарен и здравствен инспекторат, меѓутоа и УЈП има право и обврска да постапи и кај овие даночни обврзници кои се од јавен интерес зашто тие се лицето на општеството и на државата, рече Лукаревска.