Собранието во рамки на денешната 84. седница ги изгласа Oдлуката за изменување на Одлуката за именување на претседател, потпретседател, членови и заменици членови на Националниот совет за евроинтеграции и Дополнетиот предлог на закон за изменување и дополнување на Законот за Посебен регистар за лица осудени со правосилна пресуда за кривични дела за сексуална злоупотреба на малолетни лица и педофилија.
За Предлог на законот за ратификација на Дополнителниот протокол кон Конвенцијата за Договорот за меѓународен патен превоз на стоки (CMR) за електронски товарен лист, не беа исполнети деловнички услови за разгледување и беше повикан претседателот на собраниската Комисија за надворешни работи да закаже седница и да го разгледа.
Координаторот на пратеничката група на СДСМ, Оливер Спасовски, попладнево, во процедурална забелешка информира дека нивната пратеничка група нема да учествува во работата на собраниската седница. Ова следеше откако пред паузата тој побара дневниот ред да се дополни со Предлогот за изменување и дополнување на Законот за минимална плата што од партијата денеска повторно го поднесоа, но претседателот на Собранието Африм Гаши му одговори дека материјалот за законот не е готов и не е доставен до пратениците. Според Спасовски, со ваквата одлука Гаши постпаува споритвно на Деловникот на Парламентот, што вели, не е прв пат.
-Ние не баравме ништо друго освен предлогот да го ставите на гласање и денеска да се изјасниме и во тоа нема ништо спорно. Не може моето право како координатор или пратеник од опозицијата да е послабо од правото од кој било пратеник на власта, рече Спасовски.
Гаши му одговори дека досега не му се случило тој да предложи точка на дневен ред без материјалот да биде доставен до пратениците, бидејќи станува збор за основно начело на работа на Собранието.
-Не можеме да расправаме за нешто што не го знаеме, го немаме како материјал. Материјалот е на превод и штом ќе биде доставен до сите пратеници, можеме да расправаме по истиот, рече Гаши.
Собранието со работа по 84. седница ќе продолжи утре во 11 часот.