Денеска во Кочани се одбележува годишнината од трагедијата во т.н. дискотека „Пулс“, каде што животот го загубија 63 лица, а над 200 беа повредени.
На одбележувањето беше и претседателката Гордана Сиљановска-Давкова, која положи свежо цвеќе, се потпиша во книгата на жалоста и присуствуваше на комеморативниот настан, како што пренесуваат медиумите.
Според објавите на МТВ, по завршувањето на настанот претседателката се упатила во спомен-собата каде што се поставени фотографии од починатите, а секој од нив има свој тефтер за посвети.
Сиљановска-Давкова напишала вкупно 63 пораки, по една за секоја од жртвите.
МТВ потсетува дека минатата година, веднаш по трагедијата, таа упатила лични писма со сочувство до семејствата на починатите.
Утринава, во 2:32 часот, на претседателската веб-страница беа објавени имињата на жртвите со пораката:
„Оние кои ги загубивме ќе живеат со нас, сè додека постојат љубовта и сеќавањето за нив. Нивните имиња се трајно врежани во македонската колективна меморија.Вечни во нашите срца!”