Први јануари 2026 година е датумот од кога ќе стартува проектот „Безбеден град“. Министерот за внатрешни работи Панче Тошковски, по денешната јавна трибина изрази надеж дека до тогаш ќе бидат имплементирани сите промени во законите кои е потребно да се направат.
Тој најави дека интервенција ќе има во најмалку пет закони поради суштинската потреба од системски пристап за спроведување на „Безбеден град“ онака како што треба. Законот за безбедност на патиштата, Законот за прекршоци, Законот за возила, Кривичен законик и Законот за прекршоци се клучни кои треба да претрпат измени за да се постави функционално системско решение.
-Изминатиов период во прилог на тезата која ја имаме дека „Безбеден град“ и „Безбедна држава“ ќе придонесат во насока на намалување на сообраќајните незгоди, е тоа што со засилено присуство на полициски службеници во Град Скопје и покрај тоа што е зголемен бројот на прекршоци, компаративно, 2025 во споредба со 2024, лани имало околу 2000 прекршоци на територија на Град Скпје за период од десет дена, сега имаме околу 4.000 прекршоци кои се констатирани со зголемото присуство на полицијата на терен. Бројката на сообраќајни незгоди вкупно е намалена за околу 30 проценти, а бројката на сообраќајки со последица тешки телесни повреди е намалена за околу 60 проценти, истакна Тошковски.
Министерот потенцираше дека крајната цел е намалување на сообраќајните незгоди и загубата на човечки животи.
Целосното воведување на овој проект, со кој преку камерите на „Безбеден град“, ќе се контатираат прекршувања во сообраќајот и ќе се казнува, останува прв приоритет на Министерството.
Првиот човек на МВР потенцираше дека и во наредниот месец интензивно ќе работат на целокупната легислатива. Се надева дека до крајот на март ќе има првична верзија на сите закони кои треба да влезат во процедура, а веќе во април да се најдат на владина седница, а потоа и пред пратениците за гласање.
-Не ни е целта граѓаните да ги казнуваме, туку да ја смениме сообраќајната култура. Очекувам оној тест период кој го најавивме, да го имплементираме. Ќе има одреден временски период неколку месеци, граѓаните ќе добиваат пораки, ќе бидат информирани кога ќе сторат одреден прекршок, ќе се уверат дека системот ќе функционира, потенцираше Тошковски.
Дополнително покрај поставените камери на терен ќе има и возила кои ќе бидат целосно опремени со паметни камери и при движење ќе ги констатираат сите погрешно паркирани возила, а податоците од терен ќе ги испраќаат директно во системот со податоци.