В.д. претседателката на Кривичниот суд, Даниела Димовска, денес го посети притворското одделение кое се наоѓа во рамките на Затворот Скопје, а во кое во моментот се сместени 12 жени за кои кривичната постапка е во тек и сеуште не е донесена правосилна судска одлука.
-Оваа посета не беше само институционална должност, туку човечки чин и порака дека ниту една жена, без оглед на околностите, не смее да биде лишена од своето достоинство, од правото на фер постапка и од основното начелно – презумпцијата на невиност. За време на посетата посебен акцент беше ставен на потребата од родовосензитивен пристап во притворските услови, како и на обезбедување психолошка поддршка за жени кои често се соочуваат со дополнителни социјални и економски ранливости, објави Управата за извршување на санкции.
-Жената не ја губи својата вредност затоа што се наоѓа зад ѕидови, таа останува мајка, ќерка, сестра, личност со право на почит и праведност, истакна Димовска.
Таа покрај разговорите со притворените жени, оствари разговори и директорот на управата, Бобан Утковски и заеднички се договорија да се иницираат дополнителни разговори со надлежните институции за унапредување на условите и за јакнење на механизмите за заштита на правата на жените во притворското одделение.
По повод денот на жената – 8-ми Март, претседателката на судот Димовска и директорот на КПУ Затвор Скопје упатија честитка до жените сместени во притворското одделение, посакувајќи им сила, достоинство и надеж, нагласувајќи дека почитта кон жената треба да постои без оглед на околностите во кои се наоѓа.