Неофицијално дознаваме дека Финансиската полиција го уапсила Пеце Мирчески, поранешен директор на СОЗР (Служба за заеднички и општи работи на Владата) во време на владењето на Зоран Заев и Димитар Ковачевски. Курир дознава дека се вршат претреси во неговиот дом во Скопје во врска со случаи поврзани со злоупотреби во СОЗР во делот на јавни набавки и други злоупотреби.
На оваа челна позиција во СОЗР беше од самиот почеток на владеењето на Заев, од јуни 2017-та година, кога доаѓа на местото на неговиот претходник Васе Доневски.
Претресот е во координирана акција на Управата за финансиска полиција и Обвинителството.
Од ОЈО кусо соопштија дека заедно со Финансиската полиција преземаат дејствија за обезбедување докази во предмет за неколку кривични дела – примање поткуп, давање поткуп, проневера во службата и несовесно работење.
„Во тек се претреси на локации во Скопје, за што е обезбедена наредба од судија на претходна постапка, а се преземаат и други дејствија“, соопштија од ОЈО.
Извори од истражните органи вклучени во постапката велат дека истрагата опфаќа сомневања за финансиски злоупотреби во времето кога Мирчески беше прв човек на СОЗР, а неговото раководење со институцијата било предмет на проверка од Финансиската полиција во изминатите пет месеци. Пеце Мирчески беше директор на Службата за општи и заеднички работи во периодот од цели 7 години – од јуни 2017 до јуни 2024 година. Тој имаше и партиска функција како претседавач на Централниот одбор на СДСМ.
Курир побара, но се уште нема официјална потврда од МВР и Финансиска полиција за апсењето на Мирчески.