„Денеска под мотото „Лидерство за промени“ ја одржуваме конвенцијата за избор на идниот претседател, односно претседателка на Република Македонија. Во првиот дел на Конвенцијата, кандидатката за претседателка Гордана Силјановска Давкова даде свое образложение, ја понуди својата визија, план и програма како планира да ја води државата во иднина“, истакна Драган Ковачки, пратеник и член на ИК на ВМРО-ДПМНЕ во изјава за вестите на Алфа телевизија.
Ковачки додаде дека сега во моментов се одвива гласањето на делегатите.
„Имаме 453 делегати, вклучително и од дијаспората, значи нашите задгранични комитети на ВМРО-ДПМНЕ. Очекуваме поддршка за кандидатурата. Во попладневните часови исто така очекуваме обраќање на веќе официјалниот кандидат на ВМРО-ДПМНЕ и на нашиот претседател Христијан Мицкоски“, рече тој.
Тој нагласи дека очекува победа на претседателските избори.
„Апсолутно дека очекуваме победа, дојдено е време за промени. На Македонија треба да и се врати достоинството како во земјата така и надвор од земјата. Македонија заслужува лидер кој што ќе има интегритет, заслужува чесен лидер, заслужува лидер кој што ќе се води од правото и од правдата. Заслужува лидер кој што ќе ги почитува моралните и етичките норми. И лидер кој што ќе биде помеѓу граѓаните, кој што секогаш ќе биде отворен за граѓаните, ќе може да разговара со нив и ќе биде отворен за дебата“, појасни Ковачки.
Тој рече дека Македонија заслужува лидер како што е Гордана Силјановска Давкова, која што се очекува да носи и тешки одлуки во интерес на државата и на граѓаните.