РК Е.Пелистер му го нанесе првиот пораз на Вардар сезонава во Суперлигата, мечот мина со две навивачки групи, а Министерството за Внатрешни Работи (МВР) информира дека има уапсени лица на овој дуел.
„На 10.12.2025 во 18:45 часот на влезот во спортската сала „Боро Чурлевски“ во Битола, полициски службеници од СВР Битола ги лишија од слобода П.Н.(20), Н.А.(24) и Д.М.(24), сите од Скопје. При влегување на навивачка група од Скопје во спортската сала на ракометен натпревар, бил нарушен јавниот ред и мир, при што тие физички нападнале неколку полициски службеници кои преземале службени дејствија.
Подоцна, во 19:20 часот на влезот во спортската сала, полициски службеници од СВР Битола го лишија од слобода и Н.Ѓ.(34) од Битола затоа што го нарушил јавниот ред и мир со агресивно однесување и повикувал на насилство.“, се вели во соопштението на МВР.
Од МВР информираат дека по целосно документирање на настаните, против лицата ќе бидат поднесени соодветни поднесоци.