Еден од најуспешните пливачи на сите времиња, Американецот Рајан Лохте (41), продаде на аукција три од своите шест златни олимписки одличја, за вкупно сума од 385.520 долари, јавија американските медиуми.
Лохте ги продаде медалите преку аукциската куќа „Голдин Аукшнс“, а највисоката цена беше неговиот златен медал од штафетата 4×200 метри слободен стил на Олимписките игри во Пекинг во 2008 година, која ја освои заедно со Мајкл Фелпс. За неа доби 183.000 долари.
Златниот медал од штафетата 4×200 метри слободен стил од Олимписките игри во Рио де Жанеиро во 2016 година достигна цена од 122.000 долари, додека златниот медал од штафетата 4×200 метри слободен стил од Олимписките игри во Атина во 2004 година беше продаден за 80.000 долари.
„Никогаш не сум пливал за златни медали“, напиша Лохте на социјалните мрежи кога беше обелоденето дека ќе ги продаде своите медали на аукција.
„Мојата страст отсекогаш била да бидам еден од најдобрите пливачи во светот. Медали? Тие беа само шлаг на тортата на едно неверојатно патување. Со над 90 меѓународни медали, вклучувајќи Олимписки игри, Светски првенства и Пан-Американски игри, имав среќа да постигнам повеќе од кој било друг пливач“, додаде Лохте, кој моментално е во процес на развод од сопругата Рид, која неодамна поднесе барање за развод по седум години брак.
Лохте претходно продаде шест бронзени и сребрени олимписки медали во 2022 година за 166.000 долари.
Тој освои 12 олимписки медали во текот на својата кариера, со што е третиот најодликуван пливач во историјата на Олимписките игри, зад Мајкл Фелпс (28) и Кејти Ледеки (14).