Чаби Алонсо ја одржа својата прва прес-конференција како тренер на Реал Мадрид. Претходно во текот на денот, тој потпиша договор, кој е за три сезони.
Светскиот шампион официјално ќе започне со работа на 1 јуни и ќе го предводи тимот на Светското клупско првенство во САД, каде што првиот натпревар на тимот е на 18 јуни.
На прашањето како ќе игра неговиот Реал Мадрид, Алонсо изјави дека денешниот фудбал бара да бидете флексибилни и динамични.
-Потребно е да можете да ги поместувате парчињата. Имам идеја како сакаме да играме, но фиксната шема може да се промени. Сакам тимот да пренесува емоции, енергија, да игра амбициозно и да се поврзува со луѓето. Симбиозата што ја бараме е од суштинско значење за оваа фаза да започне добро. Сакам да го развијам потенцијалот на секого, за да ги поврзам парчињата, изјави Шпанецот.
Во однос на тоа зошто одлучил да пристигне пред Светското клупско првенство, новиот тренер на „лос бланкос“ вели дека околностите се одвивале на тој начин.
-Го гледам тоа како можност, од една страна, да се движиме напред во процесите, а од друга страна, да се бориме за уште еден пехар. Ова е првото Светско клупско првенство во овој формат, амбицијата е тука, порача Алонсо.
Истакна дека направил анализа за тоа како играл тимот, какви се играчите и тоа ќе го искористи како основа за неговите идеи.
-Тренерите зависат од играчите и мислам дека имаме играчи на многу високо ниво. Предизвикот е да се направи тим, да се искористи потенцијалот на овие играчи и сите да одат во иста насока, изјави тренерот на Реал Мадрид. (МИА)