Нетфликс се согласи да ја купи компанијата за филмови и стриминг Ворнер Брос Дискавери за 72 милијарди долари (61,78 милијарди евра) во голем холивудски договор.
Стриминг гигантот се појави како најголем понудувач за Ворнер, пред конкурентите Comcast и Paramount Skydance, по долготрајна битка.
Ворнер поседува франшизи, вклучувајќи ги Хари Потер и Игра на тронови, како и стриминг услугата HBO Max.
Се очекува преземањето да доведе до радикално преобликување на американската филмска и медиумска индустрија, но аналитичарите предупредуваат дека договорот би можел да се соочи со отпор од органите за конкуренција.
-Со комбинирање на библиотеката со серии и филмови на Ворнер со сериите на стриминг платформата како Stranger Things, „можеме да им дадеме на публиката повеќе и во исто време да го обликуваме начинот на кој раскажуваме приказни за следниот век“, рече Тед Сарандос, еден од извршните директори на Нетфликс.
„Ворнер Брос го дефинираше претходниот век на забавата, а заедно можеме да го дефинираме следниот“, рече тој.
Нарекувајќи го „голем ден“ за компаниите, Сарандос призна дека аквизицијата можеби изненадила некои акционери, но дека тоа е „ретка можност“ да се обезбеди успехот на Нетфликс „во наредните децении“.
Дејвид Заслав, претседател и извршен директор на Ворнер Брос, додаде дека договорот ќе ги обедини „двете најголеми компании за филмски приказни во светот“.
-Со партнерство со Нетфликс, ќе обезбедиме луѓето насекаде да продолжат да уживаат во најрезонантните приказни во светот за идните генерации, рече тој.
Вредноста на трансакцијата е 27,75 долари (23,8 евра) по акција на Ворнер.
Вкупната вредност на компанијата – која ги вклучува долговите на компанијата и вредноста на нејзините акции – е околу 82,7 милијарди долари (70,96 милијарди евра).
Вредноста на капиталот, или готовинската цена, е 72 милијарди долари (61,78 милијарди евра).
Управните одбори на двете компании едногласно ја одобрија трансакцијата.
Се очекува аквизицијата на Ворнер да му овозможи на Нетфликс да го прошири капацитетот за студиско производство и да ги зголеми инвестициите во оригинална содржина.
Нетфликс ќе го заврши преземањето додека Ворнер ги финализира претходно објавените планови за одвојување на сопствениот оддел за стриминг и студија од својот оддел за глобални мрежи следната година.
Нејзиниот оддел за глобални мрежи вклучува кабелски канали како што е CNN, спортски брендови и бесплатни канали во Европа.