Што се случува кога животот станува автор на твоите песни? Давид Темелков го знае одговорот, но не го кажува, тој го пее.
По првиот албум и низа синглови што ги допреа срцата на публиката низ целиот регион, Давид се враќа – поавтентичен и похрабар од било кога. Неговиот втор студиски албум, „Слушај животот штом диктира“, не е само збирка на песни. Тоа е дневник на емоции кои не можат да се премолчат, повик да го слушнеме она што најчесто молчи во нас.
Во целост кантавторски, албумот носи 13 музички приказни – секоја различна, секоја искрена. Давид ги потпишува музиката и текстовите, а со продуцентот Кристијан Синковиќ ги создава и аранжманите што го обвиткуваат секој тон во вистинска боја.
Од насловната песна „Слушај животот штом диктира“, преку нежната и емотивна „Добра ноќ ангелу“, до боемската „Седам ночи, седам дана“ и огнената „Цигане“, секоја нота има своја причина, а секој збор време.
Албумот крие и моменти кои ќе ве изненадат: песна во две верзии, италијанскиот „допир“ во „Cuore fragile“, како и македонската химна „Мојата Македонија“, која му донесе признание и голема популарност во татковината.
Овој албум не бара објаснување. Тој бара да се слуша. Секоја нота носи вистина, а секоја емоција е на своето место. Бидејќи понекогаш, најубавите мелодии ги диктира животот.
И сето тоа е создадено со внимание кон секој детаљ – од дизајнот на Ивона Бунчиќ, преку фотографиите на Лука Хорват, до внимателно продуцираните аранжмани на Кристијан Синковиќ и издавачкиот печат на Identity Media, што заедно го прават овој албум вистински музички и визуелен свет.