Во претходниот период Антиќ беше во Соединетите Американски Држави, на натпреварите од Летната лига беше дел од стручниот штаб на Мајк Буденхолзер. Сепак, тој нема да остане како дел од помошниците на Феникс Санс, туку се работи за привремен престој од поинаква природа.
Демантот за оваа приказна пристигна директно од КФСМ, а во него се нагласува дека Антиќ е во работна посета на Соединетите Американски Држави и се подготвуваат нови проекти за иднината.
- Соопштението на КФСМ ви го пренесуваме во целост:
„„Спортот ќе го оставиме на спортистите, а ќе ја изоставиме политиката и влијанието од ‘надворешни сили“ – вака започна приказната на Перо Антиќ како претседател на раководното тело на кошарката во Македонија.
Наместо да сме среќни и горди што имаме врвен, професионален однос со екипи и раководни лица во Европа и „преку океанот“, ние тоа го користиме за сензационализам и за валкање на нечие име и однос.
Перо Антиќ не бара работа. Перо Антиќ има доволно работа во Македонија и сето она што го „работи“ надвор од границите е отворање на врати исклучиво во интерес на македонската кошарка и ЗА македонската кошарка.
Благодарение на таа работа, во Македонија за неколку седмици ќе пристигне Хорхе Гарбахоса, претседателот на ФИБА Европа, а неколку дена по него ќе пристигне и Андреас Заглис, генералниот секретар на ФИБА свет којшто е еден од највлијателните лица во светската кошарка. Секојдневната комуникација со ФИБА и со НБА резултира со голем број на проекти, летни лиги, кампови и разни обуки на стручни лица во кошарката кои придонесуваат за развојот во Македонија. Во иднина очекуваме зголемување на обем на работата и проектите на Федерацијата за добро на сите кошаркарски работници.
Клубовите кои се вознемирени од ваквите написи и веќе нè контактираа ги уверуваме дека ќе продолжиме да ја оправдуваме довербата која несебично ни ја даваат во текот на сиве овие години.
Секој кој продолжува да го валка името на овој тим, поединечно или како целина, само докажува за својот личен карактер и зли намери“, стои во соопштението.
Според напишаното од страна на КФСМ, претседателот со секоја работна посета надвор од границите на Македонија се труди да придонесе за развојот на кошарката.