Свети Василиј Острошки
Родум од Попово Село во Херцеговина, од родители прости но благочестиви. Од малечок беше исполнет со љубов кон Божјата Црква, а кога порасна отиде во требињскиот манастир на Успение на Пресвета Богородица и прими монашки чин. Набрзо се прочу со својот сериозен и редок подвижнички живот, зашто себеси си налагаше подвиг врз подвиг, с ? потежок и потежок. Подоцна го посветија за епископ Захумски и скендериски, наспроти неговата волја. Како архиереј прво живееше во манастирот Тврдош и оттаму како добар пастир го утврдуваше своето стадо во православната вера, чувајќи го од турската свирепост и од латинското лукавство. А кога непријателите многу го притеснија, а Турците го разорија Тврдош, се пресели во Острог, каде што тврдо се подвизуваше, оградувајќи го своето стадо со непрестајни молитви. Се упокои мирно во Господ во 16 век. Неговите мошти останааа цели и целебни, нераспадливи и чудотворни до денешен ден. Чудата на гробот на Св. Василиј се безбројни. Кон неговите мошти притекнуваат и христијаните и муслиманите и наоѓаат исцеленија во најтешките маки и болести. Секоја година на Педесетница во Острог станува голем народен собир.
Тропар
Од младоста своја целиот себе на Бога си се предал, пребивајќи во молитви, подвизи и постови, отче богоносен: си бил пример на добродетели на стадото твое. Поради тоа Бог ја виде твојата добра намера и те постави во Црквата Своја како пастир и ревносен архиереј, и после твоето упокоение, твоето тело се сочува нетлено, светителу Василие; затоа, како оној кој има смелост, моли се на Христа Бога да ги спаси нашите души.
Светите девет маченици во Кизик
Овие деветмина храбри маченици во кои гореше љубовта Христова не сакаа да им принесат жртви на идолите ниту да се одречат од Господ Христос, заради што беа луто мачени и најпосле убиени со меч. Во времето на царот Константин во Кизик беше изграден храм во чест на овие маченици, а таму ги положија и нивните нетлени мошти. Нивните имиња се: Теогниј, Руф, Антипатар, Теостих, Артем, Магн, Теодот, Тавмасиј и Филимон. Презреа с ? минливо заради вечното. Затоа Господ ги воведе во Своите вечни обители и им даде венци на непропадлива слава. Чесно пострадаа и се прославија во 3 век.
Тропар
Непоколебливи во верата света како гората Сион, огнена ревност имајќи како Илија, вие свети девет маченици, словото Божјо докрај го запазивте, молете се за нас сега, престојувајќи пред престолот Божји, затоа што слобода имате пред Оној Кој вашите мошти ги покажа нетлени и преку нив мноштво чудеса сотвори.
Преподобен Мемнон Чудотворец
Се предаде на пост и молитва од младоста. Толку го очисти своето срце што стана живеалиште на Светиот Дух. Ги исцелуваше неисцелливите болни и правеше многубројни други чуда. Се јавуваше и во морски бури и ги спасуваше бродовите од пропаст. Мирно се упокои во Господ во 2 век и се пресели во Неговите небесни дворци.
Тропар
Помислите погубни како скакулци од силен ветер беа однесени од секој кој твоето име го призива, о Мемноне Божји угодниче. Благодатта која во тебе делуваше славата Господова преку чудотворства ја прикажуваше, затоа поитај од Христа да испросиш за нас милост голема.