Младиот Македонец Андреј Јанески го живее својот спортски сон. По успесите во Македонија, тој со семејството се пресели во Швајцарија. Во оваа земја која нуди многу можности за младите спортисти, Андреј игра со полно срце, но мислите и емоциите му се сепак дома, во Македонија.
Ова момче е родено во Прилеп и на само 7-годишна возраст почна да го исполнува својот сон – да биде ракометар. Редакцијата на КУРИР, уште пред осум месеци пишуваше за овој млад талент, а сега го контактиравме повторно.
-Ви благодарам што ме следите мене и моето напредување во ракометната кариера. Јас сè уште играм во HC TV SOLOTHURN во кантонот SOLOTHURN каде што учам и живеам со моите родители. Од оваа сезона сум преместен да играм во повисока генерација и лига. Играм во генерацијата U19, а исто имам и добиено двојна регистрација за да можам да играм и за А и Б тимот на кантон SOLOTHURN кои се натпреваруваат во елитната лига на Швајцарија, ни кажа тој.
Андреј пред себе си поставил нов предизвик во однос на позициите.
-Можам да се пофалам дека покрај мојата постоечка позиција Пикер пробувам да играм и на позиција лев Бек. Ова за мене значи голем исчекор нанапред во развојот како професионален ракометар, открива тој.
Го прашавме што значат новите дозволи и дали се тие чекор поблизу до исполнување на неговата цел.
-Со дозволата за играње за А и Б тимот се добива статус за потпишување на професионален договор со што ќе се оствари мојот најголем сон да се бавам професионално со ракомет, ни кажа Андреј.
Вложува максимум за свој индивидуален успех, но ракометот е екипен спорт, па секако, ни се пофали и со успехот на екипата.
-Во оваа сезона би можел да се пофалам дека како екипа успеавме да се избориме за натпреварување во ИНТЕР КУП кој важи за еден од најдобрите во Швајцарија. Исто така пред мене и мојот клуб претстои еден тежок натпревар овај викенд со екипата на АРГАУ и доколку го добиеме и овај натпревар ќе биде најголем успех за мојот клуб до сега бидејќи ќе се пласираме на ниво на U19 за прв пат во најелитната лига т.е.борбата за титула на ниво на Швајцарија, рече младиот ракометар.
Редовно го следи македонскиот ракомет, а има и свои идоли.
-Македонскиот ракомет го следам постојано како за помалите категории така и Македонската супер лига. Од ракометарите иако пензиониран би го издвоил Столе Стоилов. Меѓу омилените ми е Пешевски, а од другите Кузманоски, вели Андреј.
Кога летово разговаравме со него, ни ја откри големата желба, еден ден да заигра под боите на македонското знаме. Како што ни откри, Македонија му е во срцето, каде и да живее.
– Да, таа желба сè уште ја имам и никогаш нема да се откажам еден ден да заиграм за Македонската ракометна репрезентација. Сепак јас иако живеам во Швајцарија, Македонија е местото каде сум роден и пораснат. Иако мала земја, но ја носам во срцето, ни кажа Андреј.
