Бројот на убиени се зголеми за повеќе од 1.100 откако Меѓународниот суд на правдата (МСП) во Хаг пред една недела му нареди на Израел да стори сé што може за да спречи убивање, разорување и каков било чин на геноцид врз Палестинците во Газа.
Израел ги негира обвинувањата за геноцид, изнесени од Јужноафриканската република која поднесе тужба во Хаг и вели дека се бори да го уништи Хамас, кој управува со Газа.
За конечната пресуда на МСП најверојатно ќе биде потребна цела година, посочуваат западни медиуми.
Како што е наведено денеска, од почетокот на војната досега се убиени 27.019 Палестинци, а 66.139 се ранети. Не беше прецизирано колку жени и деца се убиени, но претходно беше соопштено дека тие сочинуваат две третини од жртвите.
Палестинското Министерство исто така во извештаите за убиените не прави разлика меѓу цивили и борци.
Израел тврди дека илјадници екстремисти на Хамас се убиени во војната, но засега не дал докази за тоа.
Војната започна со упадот на стотици палестински екстремисти предводени од Хамас во јужен Израел на 7 октомври, кога беа убиени 1.200 луѓе, главно цивили, а околу 250 заложници беа однесени во Газа.