Во општина Ѓорче Петров за првпат е конституиран Локалниот младински совет, со што се отвора ново поглавје за вклучување на младите во процесите на одлучување на локално ниво.
Градоначалникот Александар Стојкоски преку објава информираше дека ова тело ќе претставува директна врска меѓу младите и општинската администрација, со цел поефикасно застапување на нивните интереси и идеи.
За претседател на Советот е избрана Ирена Петковска, додека функцијата заменик-претседател ќе ја извршува Бојан Ристовски. Според најавите, раководството ќе има клучна улога во координација на иницијативите и активностите на младите во општината.
Советот е составен од седум претставници од различни организации и подмладоци, што, како што се наведува, обезбедува инклузивност и поширока застапеност на младинските ставови.
„Ова не е само формално тело, туку простор каде младите ќе можат директно да влијаат врз креирањето политики“, истакна Стојкоски, додавајќи дека општината останува отворена за нови идеи и иницијативи.
Формирањето на Локалниот младински совет се оценува како чекор напред во насока на зајакнување на младинското учество и поттикнување на активното граѓанство во Ѓорче Петров.