Граѓаните на Швајцарија денеска се изјаснуваат на референдум за четири клучни прашања – предлогот на Парламентот за посебно оданочување на брачните двојки, намалување на надоместокот за јавниот сервис, предлогот за уставно гарантирање на достапноста на готовината, како и за иницијативата за формирање нов климатски фонд.
Индивидуално оданочување на сопружниците
Кога станува збор за воведување индивидуално оданочување за брачните парови, последната анкета спроведена во февруари покажува дека 52 отсто од населението ја поддржува оваа голема промена, додека 44 отсто се против. Ова претставува остар пад на поддршката во споредба со јануари. Според сегашниот систем, сопружниците во Швајцарија се оданочуваат заеднички. Со реформата, тие би се оданочувале исто како и невенчаните парови – секој со посебна даночна пријава и стапка заснована исклучиво на сопствениот приход. Конзервативните партии се противат на ова, сметајќи го за напад врз традиционалниот семеен модел, додека кантоните стравуваат од фискални загуби и зголемена бирократија.
Намалување на претплатата за јавниот сервис
Швајцарците денеска гласаат и за иницијативата за намалување на надоместокот за радиодифузната лиценца од 335 на 200 швајцарски франци по домаќинство. Поддржувачите на оваа идеја, предводени од десничарската Швајцарска народна партија, тврдат дека поради растот на трошоците за живот, претплатата мора да се намали. Тие сметаат дека буџет од 850 милиони франци е доволен за основните услуги. Противниците, меѓу кои се Владата и Парламентот, предупредуваат дека тоа ќе го загрози квалитетот и разновидноста на јавните медиуми. Последните анкети велат дека 54 отсто од гласачите се против ваквото кратење.
„Готовината е слобода“
Една од иницијативите со најголема поддршка (61 отсто) е „Готовината е слобода“, со која се бара во Уставот да се впише достапноста на банкнотите и монетите. Иако Швајцарците сè поретко користат кеш, тие сакаат тој да остане достапен како опција. Владата претстави контрапредлог кој во принцип се согласува со идејата, но користи поширок термин „готовина“ наместо специфично „монети или банкноти“, следејќи ги правните принципи.
Климатски фонд – пред неуспех?
Најмали шанси за поминување има иницијативата за формирање федерален фонд за обновливи извори на енергија и заштита на биодиверзитетот. Дури 65 отсто од гласачите се изјасниле против овој предлог на Социјалдемократите и Зелените, со кој се бараше инвестирање на 0,5 до 1 отсто од БДП во еколошка трансформација. Владата го отфрла предлогот како прескап и неефикасен.
Гласачките места се отворени во текот на целиот ден, а првични резултати се очекуваат во попладневните часови.