Германскиот канцелар Фридрих Мерц повика на доверба и покрај глобалните кризи и изрази поддршка за спроведување на клучните економски реформи.
– Во наши раце е да го надминеме секој од овие предизвици преку сопствени напори, рече германскиот канцелар во своето новогодишно обраќање, според претходно објавената копија од неговиот говор.
– Ние не сме жртви на надворешни околности. Не сме пиони на големите сили, рече тој, пренесува ДПА.
Осврнувајќи се на војната во Украина, заканите од Русија и затегнатите односи со Соединетите Американски Држави, Мерц рече дека е свесен оти многу луѓе се загрижени за мирот во еден несигурен свет.
– Ви велам: Ние се грижиме за нашата безбедност. Живееме во безбедна земја, рече тој, додавајќи дека капацитетите за одвраќање мора да се зајакнат за да се одржи таа безбедност.
Мерц, исто така, ги истакна пензиските реформи кои веќе ги почна неговата владина коалиција. Контроверзниот пакет пензиски реформи беше усвоен од страна на пратениците на почетокот на декември по неколкумесечни политички расправии.
Тој упати апел за јавна поддршка за понатамошните планирани измени. Рече дека многу луѓе сметаат дека преземените чекори досега не биле доволни и дека нивните ефекти сè уште не се видливи.
Мерц изјави дека нивната загриженост е оправдана, но изрази уверување дека „Германија ќе ги жнее плодовите од овие реформи, дури и ако за тоа е потребно време“.
– Така, 2026 година може да биде момент на нови почетоци. Тоа е перспективата што сакам да ја отворам за вас и за сите нас, рече тој.
Според Мерц, следната 2026 би можела да биде година во која Германија и Европа ќе им се вратат на деценискиот мир, слобода и просперитет со обновена енергија.
– За да го постигнеме ова, мора да си веруваме себеси, на нашата храброст и на нашиот порив … Да не ги слушаме оние што шират страв и најавуваат пропаст, рече Мерц.