Австралија ќе воведе широки реформи за ограничување на говорот на омраза, изјави денеска австралискиот премиер Ентони Албанезе, неколку дена по најтрагичното масовно убиство во земјата во последните три децении, кое се случи за време на прославата на еврејскиот празник Ханука.
Вооружени татко и син отворија оган додека стотици луѓе ја прославуваа Ханука на познатата плажа Бонди, во Сиднеј, во неделата, убивајќи 15 лица во нападот инспириран од Исламска држава, кој ја шокираше нацијата и доведе до страв од пораст на антисемитизмот.
Албанезе рече дека владата ќе се обиде да воведе закон што ќе го олесни гонењето на луѓето кои промовираат говор на омраза и насилство, зголемени казни и мерки за борба против организациите чии лидери користат говор на омраза.
Полицијата соопшти дека нападот на прославата на Ханука го извршиле Саџид Акрам (50) и неговиот 24-годишен син Навид.
Саџид беше убиен од полицијата на местото на нападот, додека Навид Акрам беше ранет и вчера откако се разбуди од кома беше обвинет за 59 прекршоци, вклучувајќи обвиненија за убиство и тероризам.