Летонија ќе го продолжи ноќното затворање на воздушниот простор долж источните граници со Русија и со Белорусија на неопределено време, соопшти денеска Министерство за одбрана.
Воздушниот простор на Летонија ќе остане затворен од 20 до седум часот секој ден, при што мерката ќе се применува на височини до 6.000 метри и зона што се протега 50 километри во внатрешноста од границата.
Летонија, која е членка на Европска Унија и на НАТО, прво го затвори небото во септември по инцидентите со беспилотни летала во соседна Полска. Воздушниот простор на земјата првично беше затворен една недела, а потоа продолжен до 8 октомври.
Летонија дели граница од 283 километри со Русија и граница од 172 километри со Белорусија, кои се дел од надворешната граница на ЕУ. Беспилотните летала, исто така, навлегоа во воздушниот простор на Летонија откако Русија ја нападна Украина.
Владата во Рига, исто така, воведе забрана за организирани автобуски услуги до Русија и Белорусија, која стапува во сила на 1 ноември, наведувајќи ги ризиците за национална безбедност. Мерката ќе ги запре групните патувања, како што се шопинг патувањата, како и патувањата на спортски и културни настани.