Полскиот премиер Доналд Туск изјави дека Полска отфрла какви било манипулации и дезинформации кои сугерираат дека Украина е одговорна за навлегувањето на руски дронови во полскиот воздушен простор во услови на масовни руски напади врз Украина.
Изјавата следуваше по состанокот на Советот за национална безбедност, на кој присуствуваа премиерот Туск, претседателот на Полска Карол Навроцки и други високи функционери.
– Оваа позиција на нашата армија, служби, претседателот и мојата е недвосмислена – ние ги отфрламе сите манипулации и дезинформации кои тврдат дека Украина стои зад овој напад, дека тоа е украинска провокација, изјави Туск.
Тој истакна дека според достапните информации, одговорноста за настаните во полското небо паѓа врз Руската Федерација.
Советот, додаде Туск, се фокусирал на пропагандата што ја шири Москва, како и на поврзаните активности во Полска.
– Сè полесно можеме да ги идентификуваме оние кои, било од политички причини, било од глупост или предавство, ѝ служат на руската пропаганда и дезинформација, нагласи полскиот премиер.