Газа е „непогодна за живот“ три месеци по ужасните напади на Хамас врз Израел, изјави денеска шефот на хуманитарните операции на ОН Мартин Грифитс и предупреди за катастрофална здравствена состојба.
Грифитс во изјавата наведе дека во Газа „луѓето се соочуваат со највисоко ниво на несигурност за храна досега забележано“ и дека „гладот е на праг“.
Покрај тоа, жителите на Газа се „очевидци на секојдневните закани за сопственото постоење, додека светот гледа“, рече тој.
Заменик-генералниот секретар на ОН за хуманитарни прашања, исто така, рече дека десетици илјади луѓе, главно жени и деца, се убиени или ранети, дека семејствата спијат надвор иако температурите опаѓаат и областите каде што на Палестинците им е кажано да се засолнат се бомбардирани.
Неколкуте делумно функционални болници се преполни и нема залихи, се шират заразни болести, а во услови на хаос, 180 Палестинки се породуваат секој ден.
Грифитс ги повтори барањата на ОН за итен прекин на конфликтот и ослободување на заложниците.
„Време е меѓународната заедница да го искористи сето свое влијание за да се случи ова“, рече тој, додавајќи дека хуманитарните работници биле соочени со „невозможна мисија“ да пружат помош на повеќе од два милиони луѓе.
„Газа го покажа најлошото кај човековиот род и одамна помина времето војната да заврши“. (МИА)