Израелскиот премиер Бенјамин Нетанјаху во вчера изјави дека Израел веднаш ќе започне преговори за ослободување на заложниците од Газа и крај на речиси двегодишната војна под услови прифатливи за Израел.
Обраќајќи се пред војниците распоредени во Газа, Нетанјаху рече дека се сретнал со командантите и одобрил планови за освојување на градот Газа и уништување на Хамас.
„Во исто време, дадов инструкции веднаш да започнат преговори за ослободување на сите наши заложници и крај на војната под услови прифатливи за Израел“, рече тој. „Ние сме во фаза на донесување одлуки.“
Израелската војска продолжи да врши притисок врз градот Газа во четврток. Во среда повика 60.000 резервисти, што укажува дека владата продолжува со планот и покрај меѓународната осуда.
Мобилизацијата на десетици илјади војници веројатно ќе трае со недели, давајќи им време на медијаторите да се обидат да ги премостат разликите околу новиот предлог за прекин на огнот што Хамас го прифати, а на кој Израел сè уште не одговорил.
Планот предвидува 60-дневен прекин на огнот, ослободување на 10 живи заложници што ги држи Хамас во Газа и 18 тела. Израел за возврат ќе ослободи 200 палестински затвореници.
Израел претходно побара Хамас одеднаш да ги ослободи сите 50 заложници. Израелските власти веруваат дека 20 од нив се живи.