Началникот на Генералштабот на Армијата, генерал мајор Сашко Лафчиски, ќе учествува на дводневна Конференција за војување на копнените сили (Land Warfare Conference – LWC) во Лондон. За време на конференцијата ќе се образложуваат, анализираат и дискутираат теми од современото војување и други теми важни за современиот начин на војување на Вооружените Сили (ВС) на ОК, но и на сојузниците и партнерите на НАТО.
Пред почетокот на конференцијата, генералот Лафчиски ќе оствари средба со Заменик Началникот за Штабот за Одбрана на ВС на ОК, воздухопловниот маршал Харви Смит, како и со тимот одговорен за креирање на Стратегискиот Одбранбен Преглед на Обединетото Кралство.
За време на дводневната посета, Началникот на Генералштабот ќе ја посети и Кралската Воена Академија во Сандхрст, каде ќе оствари средба со командантот на академијата, со цел потврдување на досегашната плодна соработка, како и идното школување на офицери од Армијата.