Насилство при нарушување на јавниот ред и мир, недозволена трговија со дрога и сторени повеќе сообраќајни прекршоци. За овие дела 20 годишниот Васил Јованов, се наоѓа во евиденцијата на Министерството за внатрешни работи.
-Лицето за кое прашувате изминатите неколку години во електронските евиденции на Министерството за внатрешни работи се јавува како лице кое учествува во неколку кривично-правни настани поврзани со недозволена трговија со дрога, нарушување на јавниот ред и мир-насилство и како сторител на повеќе сообраќајни прекршоци. Од страна на Министерството за внатрешни работи соодветно е постапувано и за истото се поднесени соодветни поднесоци и платни налози, стои во одговорот на МВР.
Од ОЈО претходно информираа дека имало пријави за неовластено производство и пуштање во промет наркотични дроги, психотропни супстанции и прекурсори и за сообраќајна незгода во која едно лице се здобило со полесни повреди. Осомничениот бил во притвор, а потоа Основниот кривичен суд Скопје одлучил да му изрече воспитна мерка упатување во воспитно поправен дом, укинувајќи ја притворската мерка.
Јованов е осомничен дека автомобилот со кој ја усмрти 22 годишната Фросина Кулакова, го управувал без возачка дозвола со 0,82 промили присуство на алкохол во урина, а кога дошол пред обележан пешачки премин на крстосницата со ул.„29-ти Ноември“, не ја приспособил брзината на движење на возилото спрема својствата и состојбата на патот и сообраќајот и другите сообраќајни услови за да може навремено да го запре возилото пред секоја пречка.
Судот за ова дело на Јованов му одреди 30 дневен притвор.