Денеска во Владата на Република Македонија одржавме состанок со Премиерот Мицкоски, министерот за економија и труд Дурмиши, директорот на Државниот пазарен инспекторат, Влатко Стојкоски и директорката на Комисијата за заштита на конкуренција, Малинка Силјановска Николиќ каде дискутиравме за состојбата со цените во малопродажбата и обидите за злоупотреба на некои субјекти, како и за најавениот бојкот на граѓаните на маркетите, како чин на граѓански отпор против монополското однесување и општествената неодговорност на поединечни трговци, објави Марјан Ристески, заменик министер за економија и труд.
-Како Влада, остануваме целосно посветени на борбата против неправедните трговски практики и злоупотребите кои директно влијаат на животниот стандард. Имаме јасни сознанија дека одредени субјекти на шпекулативен начин се обидуваат да генерираат огромни профити на грбот на граѓаните, ова е неприфатливо и нема да биде толерирано!
На денешната средба беа дадени насоки за итни реакции на сите служби на терен, каде ќе се проверува однесувањето на трговците и ќе се спречат какви било злоупотреби. За сите оние кои си поигруваат со законот и сакаат неправедно да се богатат на грбот на граѓаните, ќе има ригорозни казни.
Ќе се справиме со овој проблем и ќе направиме сè што е во наша моќ за да го заштитиме животниот стандард на сите наши граѓани! Во исто време, ќе продолжиме и со субвенционирање на најпогодените категории на граѓани за дополнително да ги минимизираме негативните ефекти од растот на цените“, нотира во објавата.
Ова се времиња на чесност, фер игра и солидарност! Заедно ќе изградиме систем кој ќе биде во корист на сите, наспроти интересите на неколкумина кои сакаат да се богатат на маката на граѓаните!, потенцира Ристески