Украинскиот претседател Володимир Зеленски синоќа изјави дека во текот на неделата се очекуваат нови дипломатски вести и дополнителни пакети поддршка за Украина.
– Денеска се подготвуваме за работа со партнерите за неделата пред нас, особено со нашите европски партнери – со оние кои многу фундаментално и ефикасно нè поддржуваат. Создадовме нов формат на соработка – Украина плус северноевропските земји. Во рамките на овој формат, постојано ја зголемуваме нашата соработка, било да е одбранбена, политичка или економска. Во сржта на ова е нашата заедничка визија за Европа каква што сакаме да им ја оставиме на идните генерации, истакна Зеленски во вечерното видео-обраќање.
Тој најави и преговори со членките на Нордискиот совет. – Ќе разговараме со нордиските земји за нови принципиелни чекори кои ќе го зголемат притисокот врз Русија за оваа војна и ќе поттикнат фер дипломатија. Оваа недела ќе има нови дипломатски вести и пакети поддршка за Украина, рече Зеленски.
Претходно, финскиот премиер Питери Орпо најави средба со Зеленски. – Со нетрпение го очекувам состанокот со претседателот Зеленски на Нордискиот совет во Рејкјавик. Финска е една од најсилните поддржувачи на Украина во Европа, рече Орпо.
На официјалната веб-страница на Нордискиот совет е објавено дека украинскиот претседател ќе учествува на седницата на советот, каде што ќе се обрати на членовите на собранието во Рејкјавик на 29 октомври. Главна тема на овогодинешното заседание е „Мир и безбедност на Арктикот“.
За време на посетата на Исланд, Зеленски ќе оствари и билатерални средби со премиерите на нордиските земји.