Повеќе од четири години по државниот удар, граѓаните во Западноафриканска Гвинеја денеска излегуваат на гласачките места за да изберат претседател на земјата, а се очекува лидерот на државниот удар, генерал Мамади Думбуја, да победи во првиот круг од гласањето.
Доколку ниту еден кандидат не добие повеќе од 50 отсто од гласовите, се планира втор круг на избори.
Думбуја го предводеше воениот удар со кој беше соборен тогашниот претседател Алфа Конде, во септември 2021 година, и оттогаш владее со земјата со околу 15 милиони луѓе како преоден претседател.
Тој се натпреварува против осум противкандидати за кои се смета дека имаат мали шанси за победа. Највлијателниот опозициски политичар, Селу Далеин Дијало, беше исклучен од изборната трка.
Првично, генералот вети дека нема да се кандидира за функција. Меѓутоа, тоа се промени во септември кога на контроверзен референдум беше усвоен нов Устав на земјата, со кој, исто така, се продолжува мандатот на претседателот од пет на седум години. Двете мерки беа дочекани со остри критики од опозицијата.
Во главниот град Конакри, изборните постери со ликот на Думбуја доминираат во градскиот пејзаж, а генералот се смета за популарен. Соборувањето на Конде, кој беше обвинет за полициско насилство и кој бараше уште еден мандат на функцијата и покрај отпорот, беше широко поддржано.
Покрај тоа, многу Гвинејци се надеваат на економски развој – особено преку големиот рударски проект Симанду, еден од најважните проекти за железна руда во светот, кој започна со работа во ноември.