Дефорестацијата на бразилската област Амазонија забави за првпат по четири години, со помалку од 10.000 квадратни километри шума исечени за една година, покажуваат прелиминарните податоци на Националниот институт за вселенски истражувања (Инпе).
Од август 2022 година до јули 2023 година, изгубена е површина од околу 9.000 квадратни километри шума, соопшти вчера бразилското Министерство за животна средина и климатски промени, повикувајќи се на податоци на Инпе.
Тоа е приближно иста површина како и островот Кипар, и намалување од 22 отсто во споредба со истиот период минатата година, кога беа изгубени речиси 11.600 квадратни километри шума. Ова е и најниската бројка од 2019 година. Амазонската прашума игра важна улога во меѓународната борба против климатските промени. Бразил поседува голем дел од Амазонија, приближно колку западна Европа, кој опфаќа девет земји.
Левичарскиот политичар Луис Инасио Лула да Силва, кој по третпат положи заклетва како бразилски претседател на 1 јануари, не беше познат како екологист за време на неговите претходни мандати од почетокот на 2003 година до крајот на 2010 година. Но, во говорот во Обединетите нации во септември, Лула повика на решителна борба против климатските промени и растечката социјална нееднаквост што ја предизвикуваат.
На меѓународниот самит за Амазонија во август, Лула рече дека „никогаш не било поитно“ да се зачува Амазонија и дека приоритет ќе му даде заштита на животната средина и климата.
По четири години, Германија неодамна продолжи со исплата на помош на фондот за заштита на прашумите во регионот на Амазонија. Овој таканаречен фонд на Амазон беше основан во 2008 година, но беше замрзнат поради несогласувања околу користењето на парите под владата на поранешниот претседател Жаир Болсонаро.
За десничарските популисти, регионот на Амазонија првенствено претставува неискористен економски потенцијал. За време на мандатот на Болсонаро од 2019 до 2022 година, уништувањето на шумите и земјоделството нагло се зголемија. ј